Wednesday, April 29, 2015

Յառա՜ջ, ապրիլը հաղթել է


Գարունը  հայ ժողովրդի համար բնավ չնշանավորվեց վերածննդով ու գարնանային տրամադությամբ, իսկ ապրիլը դարձավ համաժողովրդական ողբերգություն, համամարդկային ոճիրի արտահայտություն: Գարնանը թուրքն իրագործեց մարդկության դեմ կատարած երբեմնի ամենածանր հանցանքներից մեկը՝ ցեղասպանությունը՝ մտածելով թողնել մեկ հայ թանգարանի համար: Բայց իր հաշվարկներում սխալվեց մարդակեր գազանը, որովհետև այսօր՝ հարյուր տարի անց, հայը հաստատուն կանգնած է հանուր մարդկության առաջ և պահանջում է արդար հատուցում: Հայը այսօր դարձել է մեկ բռունցք, ծովացել, փոթորկվել ու պահանջում է ողջ աշխարհից արդար հատուցում միլիոն ու կես անմեղ նահատակների համար:
Ապրիլի 23-ին Բերդի ավագ դպրոցում միջոցառում էր՝ նվիրված Հայոց եղեռնի հարյուրամյա տարելիցին: Տարելիցները սովորաբար տարբեր են լինում, բայց այս մեկը առանձնահատուկ նշանակություն ուներ՝ իմաստավորել անցյալը ու վերապրել մի ողջ ժողովրդի ողբերգական պատմությունը, ուժ գտնել շարունակելու, որովհետև ապրելն ինքնին հաղթանակ է:
Ութերորդ դասարանի աշակերտները մոմավառությունից հետո ասմունքեցին հատվածներ Շիրազի «Հայոց դանթեականը» պոեմից , Սևակի և Վարուժանի ստեղծագործություններից: Միջոցառման նպատակն էր աշակերտների մոտ ձևավորել գիտակցական վերաբերմունք հայ ժողովրդի պատմական ճակատագրի արյունալի էջերի նկատմամբ և ծանոթանալ մեր պատմական բախտի մասին պատմող հայտնի ստեղծագործություններին: Միջոցառմանը մասնակցում էին ուսուցիչներ, ծնողներ, աշակերտներ:

Հաջորդ օրը՝ ապրիլի 24-ին, ողջ դպրոցն այցելեց Սորան՝ իր հարգանքի տուրքը մատուցելու Եղեռնի զոհերին. ծաղիկներ դրվեցին եղեռնի զոհերի  հիշատակին կառուցված հուշարձանին, մատուցվեց պատարագ նահատակների հոգիների հանգստության համար, կատարվեց մոմավառություն: Բնությունն էլ սգում էր ողջ հայության հետ մանրահատիկ անձրևով և ձյան հատուկենտ փաթիլներով:
Ապրե՜նք երկար, որովհետև ապագան մերն է:

 Յառա՜ջ, ապրիլը հաղթել է...
                                                                                                 Հեղինակ՝ Լ. Թումանյան

Sunday, April 12, 2015

ՍՈՒՐԲ ԶԱՏԻԿԸ՝ ՀՈԳևՈՐ ԿԵՆՏՐՈՆՈՒՄ


Այս տարի Սուրբ Զատիկը նշվեց ապրիլի 5-ին: Հենց այդ օրն էլ Բերդի նորակառույց Սբ Հովհաննես եկեղեցում մատուցվեց պատարագ, ապա եկեղեցու բակում տեղի ունեցավ
ճանաչողական միջոցառում: Միջոցառման նպատակն էր խթանել հոգևոր կյանքն ընդհանրապես մեր տարածաշրջանում, ևս մի անգամ հաղորդակցվել հոգևոր մշակույթին և դաստիարակությանը: Բերդի և հարակից գյուղերի ուսումնական հաստատությունները ձևավորել էին անհատական սեղաններ՝ ներկայացնելով տոնի խորհուրդը և խորհրդանշանները: Մրցութային ծրագիրը վերաբերում էր ոչ միայն Զատիկի՝ որպես եկեղեցական տոնի ներկայացմանը, այլև գեղեցիկ և ճաշակով ձևավորմանը: Կազմվեց հանձնաժողով Բերդի տարածաշրջանի հոգևոր հովիվ Տեր Արամ քահանա Միրզոյանի գլխավորությամբ: Հանձնաժողովը շրջում և գնահատում էր սեղանների և՛ պարունակությունը, և՛ ձևավորումը, և՛ աշակերտների՝ խորհրդանշանները  ներկայացնելը: Լավագույնների թվում էինք նաև մենք՝ Բերդի ավագ դպրոցը: Միջոցառումը իր ներկայությամբ պատվել էր նաև Բերդի քաղաքպետ Հ. Մանուչարյանը. նա գովեց մեր աշակերտների և ուսուցիչների համատեղ ջանքերով ձևավորված սեղանը: Ստացանք նաև խրախուսիչ մրցանակ՝ շախմատ:

Միջոցառումը շատ ուսանելի էր մեր աշակերտների և ընդհանրապես տարածաշրջանի ողջ բնակչության համար: Ամենակարևորը այն էր, որ միջոցառումն իր մեջ համախմբվելու, միասին գործելու, միասին աշխատելու խորհուրդ ուներ, իսկ միասնականությունն ու համախմբվածությունը ամեն գործի հաջողության գրավականն են: Օրը անմոռանալի էր թե՛ մեր, թե՛ քաղաքի բնակիչների և թե՛ հյուրերի համար:

Էմմա Քոսակյան

Բերդի ավագ դպրոցի ԱԽ համանախագահ

Monday, March 9, 2015

ՄԵՐ ԼԵԶՈՒՆ ՄԵՐ ԽԻՂՃՆ Է ԴԱ, ՍՈՒՐԲ ՀԱՑԸ ՄԵՐ ՍԵՂԱՆԻ…


Փետրվարի 21-ը հայոց պետական տոնացույցում իր արժանի տեղն ունի, այն  ՅՈՒՆԵՍԿՕ-ի կողմից ճանաչվել է «Մայրենիի օր»: Լեզուն յուրաքանչյուր ազգի ինքնակերտման կարևորագույն գրավականներից մեկն է, նրա գոյության վկայագիրը:
Մեր ժողովրդի համար մայրենի լեզուն ազգապահպան նշանակություն ունի, ինչպես հավատքը, մշակույթն ու հայ ընտանիքը: Հարկ է, որ հայ ընտանիքում խոսեն միայն հայերեն եւ այնտեղ իշխի հայեցի դաստիարակությունը, զանգվածային լրատվամիջոցները մատուցեն հայոց լեզվի  հարստությունն  ու գեղեցկությունը, հայ երիտասարդը սովորի եւ կիրառի հայոց լեզուն, լինի արթուն, գիտակից ու հավատարիմ իր ինքնությանը: Ահա այս հիմնախնդիրներին էր նվիրված 2015թ.
փետրվարի 20-ին Բերդի ավագ դպրոցում կայացած բանավեճ-քննարկումը, որին մասնակցում էին ավագ դպրոցի աշակերտները, ուսուցիչները: Բանավեճի կազմակերպման աշխատանքներն իրականացրել էր Բերդի ավագ դպրոցի աշակերտական խորհուրդը: Բանավեճի նպատակն էր մատաղ սերնդի մեջ դաստիարակել սեփական լեզուն արժևորելու և բարձր գնահատելու մշակույթ:  Հարցերը և պատասխանները բազմազան էին, սովորողները իրենց դիրքորոշումն էին արտահայտում լեզվաքաղաքականության, հայեցի դաստիարակության,
Հայաստանում պետական լեզվի՝ հայերենի նկատմամբ հարգարժան, պատշաճ և գիտակցված վերաբերմունք ձևավորելու մասին:


Այն մտավախությունը կար նաև, որ մեր օրերում տիրական և թելադրող դարձած «արժեքների» սանդղակում հոգևորը և այդ համատեքստում ամենաառանցքայինը՝ լեզուն, չի գիտակցվում որպես ազգային անվտանգության կամ ինքնության բաղադրիչ: Սա, իհարկե, մտահոգիչ է, որովհետև հայերեն տառերով գրված ամեն բառ դեռ հայերեն չէ: Ինչևէ, աշակերտներն իրենք եկան այն եզրահանգման, որ ազգային դպրոցն ու մայրենի լեզուն հայի ինքնության ու դրա պահպանման գրավականն են:
                                                                                           Հեղինակ՝ Լ. Թումանյան

Friday, February 6, 2015

Դիրքերից է սկսվում հայրենիքը

Այո′, հայրենիքների գոյությունը միշտ էլ պայմանավորվել է նրանց համար ամեն վայրկյան մեռնելու պատրաստ ուխտածինների գոյությամբ:         Գարեգին Նժդեհ
1991թվականի՝  ՀՀ կառավարության որոշմամբ ստեղծվեց Պաշտպանության պետական կոմիտե, իսկ հոկտեմբերի 5-ից՝ ՀՀ նախագահի հրամանով պաշտպանության նախարար նշանակվեց Վազգեն Սարգսյանը: 1992 թվականի հունվարի 28-ին պատմական որոշում ընդունվեց ՙՀայաստանի Հանրապետության պաշտպանության վերաբերյալ՚՝ այդ կերպ հայտնելով Հայկական ազգային բանակի ստեղծման մասին: Բանակը ձևավորեց ոչ թե թղթի վրա, այլ կռվի դաշտում: Եվ արդեն 23 տարի է՝ հունվարի 28-ը նշվում է որպես Բանակի օր:

2015 թվականի 28-ին Բերդի ավագ դպրոցում տեղի ունեցավ միջոցառում՝ նվիրված բանակի օրվան: Հանդիսավոր տողանից հետո օրհներգի ուղեկցությամբ բարձրացվեց հայկական եռագույնը, ապա աշակերտները ողջունեցին իրենց ավագ ընկերներին: Միջոցառմանը ներկա էին Բերդի զինկոմիսարիատի և երկու զորամասերի ներկայացուցիչները, ովքեր իրենց ողջույնի խոսքը հղեցին մեր սաներին՝ բարձրացնելով նրանց ազատատենչ ոգին: Հանդիսավոր արարողությունից հետո բոլոր դասարաններում անցկացվեցին արիության դասեր, զեկուցումներ, կինոդիտումներ և
բանավեճ-քննարկումներ: Իհարկե, բոլոր միջոցառումները միտված էին կարևորելու ռազմահայրենասիրական դաստիարակության դերը հայի, հատկապես տավուշեցու կյանքում, որովհետև այստեղ` սահմանում , խաղաղությունն այնքա՜ն նուրբ է, իսկ հայրենիքի պաշտպանությունը` օրվա հրամայական: Մեր բանակը, չնայած իր երիտասարդ տարիքին, հպարտանալու արժանի պատմություն ունի ամբարած: Իսկ մենք այսօր հպարտ ենք մեր բանակով և այն զինվորներով, ովքեր կյանքի գնով պահպանում ու պաշտպանում են մեր դիրքերը, հայրենիքը, և որոնց գոյությամբ է պայմանավորված մեր լինելիությունը, քանզի բանակը պետության գոյության հենասյունն է, իսկ լավ ու մարտունակ բանակը կրկնակի ու ամուր հենասյուն է: Բանակը ազգային հպարտություն է: 
                                    Հեղինակ՝ Ալվարդ Մեժլումյան                                             

Thursday, November 27, 2014

ԱՍՄՈՒՆՔԻ ՄԱՆԿԱՊԱՏԱՆԵԿԱՆ ՈՒԹԵՐՈՐԴ ՓԱՌԱՏՈՆԸ


Նոյեմբերի 21-ին Իջևանում տեղի ունեցավ ասմունքի մանկապատանեկան 8-րդ փառատոնը նվիրված էր Հ. Թումանյանին և Ավ. Իսահակյանին: Փառատոնին  մասնակցում էին Տավուշի մարզի տարածքային փուլում հաղթած աշակերտները:
Բերդի ավագ դպրոցը ներկայացնում էին Նարե Ծատուրյանը(10-րդ դասարան) և Արսեն Հովակիմյանը(6-րդ դասարան): Ասմունքի փառատոնը միշտ անց է կացվում ՀՀ վարչապետ Հովիկ Աբրահամյանի բարձր հովանու ներքո: Փառատոնին ներկա էին ՀՀ վաստակավոր արտիստ Գուժ Մանուկյանը, Ջուլիետա Բաբայանը, Էվելինա Շահիրյանը, բանաստեղծ Ռազմիկ Դավոյանը, Եղիշե Չարենցի  և Հովհաննես Թումանյանի տուն-թանգարանների տնօրեններըև այլք: Նախ ասմուքողներին ողջունեց Տավուշի մարզպետ Հովիկ Աբովյանը`շեշտելով, որ մասնակցությունն ինքնին արդեն հաղթանակ է, և մաղթեց բոլորին հաջողություններ: Ապա բեմ էին բարձրանում  աշակերտները և ներկայացնում իրենց նախընտրած բանաստեղծությունները:


Մրցույթը բաղկացած էր 2 մասից` ըստ տարիքային խմբերի: Աշակերտները կարդում էին Հովհաննես Թումանյանի և Ավետիք Իսահակյանի ստեղծագործություններից: Արդյունքներն ամփոփելուց հետո մրցատյանը ներկայացրեց  այն աշակերտների ցանկը, ովքեր պիտի մասնակցեն ասմունքի հանրապետական փուլին: Մասնակիցները պարգևատրվեցին խրախուսական մրցանակներով:
 

Monday, November 17, 2014

ՄԱՍՆԱԳԻՏԱԿԱՆ ԿՈՂՄՆՈՐՈՇՈՒՄ

     Նոյեմբերի 13-ին(2014թ.) ևս հետաքրքիր օր էր Բերդի ավագ դպրոցի տասներկուերորդ դասարանի սաների համար, որովհետև մեր հյուրերն էին ՀՀ ագրարային համալսարանի դասախոսներից ակադեմիկոս պ. Մխիթարյանը, դոցենտներ պրնՊապյանը և Զաքարյանը: Որպես հավելում նշեմ, որ ՀՀ ագրարային համալսարանը ներկայացնող գիտության այս անխոնջ մշակները Տավշո լեռնաշխարհի ծնունդ են: Նրանք նախ ծանոթացան աշակերտների հետ, ապա մանրամասն ներկայացրին ՀՀ ագրարային համալսարանի առաքելությունը, նշանակությունը և դերը` որպես կրթօջախի, բուհի վարկանիշը և նրա նվաճումները: Նկարագրվեց նաև ընդունելության կարգը, փաստաթղթային գործընթացը, տարբեր ֆակուլտետների առկայությունը, հեռակա և առկա ուսուցման կարգը և այլն: Հատուկ նշվեց, որ գործում է զեղչերի ճկուն համակարգ: Ապա յուրաքանչյուր մասնագետ պատմեց իր ֆակուլտետի մասին, նշեց նրա առավելությունների մասին:
ՀՀ ագրարային համալսարանը նաև ակտիվ համագործակցում է Ռուսաստանի և արտերկրի մի շարք բուհերի հետ և կատարում է ուսանողների փոխանակում: Աշակերտներն ուշադիր լսում էին դասախոսներին, իսկ վերջում նրանց ուղղեցին իրենց հետաքրքրող հարցերը: Օրինակ`հարցերից մեկը վերաբերում էր մեկ քննությամբ անվճար ընդունվելուն: Հարցերից հետո աշակերտները շնորհակալություն հայտնեցին  դասախոսներին մասնագիտական կողմնորոշման համար:
                                                                       Հեղինակ՝ Լ. Թումանյան

Friday, March 7, 2014

Ուսուցման ժամանակակից մեթոդներ

Ժամանակակից մանկավարժության առաջնակարգ խնդիրը որակյալ կրթության ապահովումն է: Յուրաքանչյուր դպրոց իր առջև նպատակ է դնում այսօրվա կյանքի պահանջներին համապատասխան որակյալ կրթություն տալ աշակերտին: Դրան հասնելու համար արդյունավետ են ամենատարբեր միջոցառումները, առաջավոր փորձի փոխանակումը և պարբերաբար կազմակերպվող սեմինար-պարապմունքները:
Օրերս նմանօրինակ սեմինար-պարապմունք էր կազմակերպվել ՀՀ ԿԳՆ Բերդի ավագ դպրոցում, որը վարում էր փոխտնօրեն Անահիտ Շառյանը: Սեմինարի նպատակն էր ևս մեկ անգամ անդրադառնալ կրթության բաղադրիչներին, մեթոդներին ու դրանց կիրառմանը դասապրոցեսում և ընդհանրապես կյանքում: Նյութերը ներկայացնելու համար օգտագործված էին նյութատեխնիկական ժամանակակից ամենատարբեր միջոցներ: Մասնակիցները գոհ էին սեմինարից` շեշտելով սեմինարների անցկացման արդյունավետությունը և ակնկալելով նմանօրինակ միջոցառումների շարունակականություն:



Հեղինակ`  Լուսինե Թումանյան